Teen Dost Aur Ek Adhoori Chai | Dil Chhoo Jane Wali Dosti Ki Kahani

Shaam ka waqt tha. Barish abhi-abhi ruki thi aur sadak ke kinare wali chhoti si chai ki tapri se uthti bhaap hawa mein ghul rahi thi. Wahi tapri—jahan hum teen roz milte the. Main, Raghav… aur Aman.

Hum teen dost the, par sirf naam ke nahi—ek-dusre ki aadat ban chuke the. School ke baad yahin aakar chai peena, sapne baantna, aur duniya ko gaali dena 😍 yeh humara routine tha.

Raghav hamesha bolta tha,
“Ek din yahin se uth ke seedha bade log banenge.”
Aman hans😄 ke jawab deta,
“Pehle chai ka bill to bhar le, bade log baad mein.”

Aur main… main bas sunta tha. Kyunki mujhe lagta tha, yeh pal kabhi khatam hi nahi honge.

Us din bhi hum tapri par baithe the. Teen kulhad, teen adrak wali chai.
Par kuch alag tha.
Aman kuch zyada hi chup tha.

“क्या हुआ?” Raghav ne poocha.
Aman ne chai ko ghoora, jaise uske jawaab usmein doob gaye ho.

“Kal jaa raha hoon,” usne dheere se kaha.

“Kidhar?”
“Delhi. Papa ka transfer ho gaya hai… aur mere liye bhi admission.”

Ek pal ke liye awaaz band ho gayi. Barish ki tap-tap bhi jaise ruk si gayi.

Raghav ne hansi mein udaane ki koshish ki,
“Arre wah! Delhi jaa ke bhool mat jana humein.”

Par Aman nahi hansa.

“Mujhe darr lag raha hai,” usne kaha.
“Tum dono ke bina… main kaunsa Aman rahunga?”

Chai thandi ho rahi thi. Kisi ne dobara sip nahi liya.

Raghav ne kandhe par haath rakha,
“Dost jagah se nahi, dil se juda hote hain.”

Badi filmy line thi. Par us waqt… sab sach lag raha tha.

Tapri wala bola,
“Chai khatam ho gayi beta, doosri bana doon?”

Hum teen ek-dusre ko dekhte rahe.
Aman ne kaha,
“Rehne do… aaj itni hi kaafi hai.”

Ek chai… adhoori reh gayi.

Agle din subah station par hum dono use chhodne gaye.
Aman ke bag mein kapde kam the, sapne zyada.

Train aa rahi thi.
Aman ne mujhe gale lagaya,
“Bhoolna Nhi.”

Raghav se bola,
“Sapne mat chhodna.”

Aur phir… train chal padi.

Hum dono wahi khade rahe. Haath hilaate rahe, jab tak Aman ek chehre se yaad nahi ban gaya.

Saale beet gaye.

Raghav ne padhai chhod di, kaam shuru kar diya.
Main shehar se bahar chala gaya.
Zindagi apni raftaar se bhaagti rahi.

Kabhi-kabhi hum milte the… par teen nahi, sirf do.

Har baar chai peene jaate, ek kulhad khaali rehti.

Ek din main wapas us shehar aaya. Barish… wahi tapri… wahi chai ki khushboo.

Raghav pehle se baitha tha.

Hamne kaha Aman bhi hota to kitna achha hota.

Tabhi ek awaaz aayi,
“Adrak wali chai milegi?”

Hum dono ek saath mud gaye.

Aman.

Thoda bada ho gaya tha, thoda thaka hua.
Par aankhon mein wahi purani shararat.

“Kya hua?” usne muskurake kaha,
“Teen chai order karun ya ab bhi aadat nahi badli?”

Maine aur Raghav ne ek-dusre ko dekha… aur bina bole hans pade.

Tapri wale ne teen kulhad rakhe.

Is baar… koi chai adhoori nahi thi.